सुनसरी । सुनसरीको देवानगञ्जमा हिन्दू धर्म छाडेका १ हजार ५ सय जना पुनः आफ्नै धर्ममा फर्किएका छन् । सनातन हिन्दू धर्म छोडेका र विभाजित भएकाहरूलाई पुनः सनातन धर्ममा स्वागत गरिएको हो । विश्व हिन्दु परिषद् नेपालले शनिबार ग्राम शुद्धीकरण महायज्ञ (घर वापसी) कार्यक्रम आयोजना गर्दै झण्डै १५ सय मानिसहरूलाई स्वधर्ममा स्वागत गरेको हो ।
उनीहरूलाई पुष्प, अक्षताले स्वागत गरिएको थियो । श्रीकृष्ण मावि छेउको मैदानमा भएको कार्यक्रममा विभिन्न राजनैतिक तथा धार्मिक अभियन्ताहरूको उल्लेख्य सहभागिता रहेको थियो । उनीहरूलाई एकै ठाउँमा राखेर प्रशिक्षण समेत दिइएको छ ।
उक्त कार्यक्रममा बोल्दै संघीय सांसद किरण साहले विभिन्न राजनीतिक आस्था, जातजाति र समुदायमा विभाजित मनहरूलाई एकताबद्ध गराउनु र सनातन धर्म संस्कृतिको संरक्षण गरेर अगाडि बढनुपर्नेमा जोड दिए । उनले धर्म परिवर्तनका नाममा भइरहेका गतिविधिमा निगरानी गर्न आग्रह गरे ।
त्यस्तै कोशी प्रदेशका प्रदेश सभा सदस्य तथा नेपाली कांग्रेस केन्द्रीय सदस्य भीम पराजुलीले सनातम धर्म, संस्कृतिलाई संरक्षण गरेर लैजानुपर्नेमा जोड दिए । उनले प्रभाव, दबाव र प्रलोभनमा परेर सनातन धर्म र संस्कृतिमाथि ह्रास आइरहेको बताए । ‘कतिपय बाह्य दबाव, प्रभाव, प्रलोभन र सांस्कृतिक अतिक्रमणका कारण केही समयदेखि हाम्रो पूर्वीय दर्शन, हाम्रो धर्म, सनातनीय संस्कारमा ह्रास आएको छ’ उनले भने, ‘अब हामीले हाम्रो धर्म बचाउनु छ । संस्कृतिको रक्षा गर्नुछ ।’
यस्तै इस्कोन विराटनगरका प्रमुख भानुभक्त जोशीले अन्य धर्म अगाल्नु पाप हुने भन्दै समुन्नत पूर्वीय दर्शनलाई आत्मसाथ गर्न आग्रह गरे । ‘हाम्रा धर्म सँस्कृति र परम्परा नै वैज्ञानिक छन् ।’ उनले भने, ‘त्यसैमा विश्वास गरेर अगाडि बढौँ ।’
कार्यक्रममा विश्व हिन्दु परिषद् नेपाल कोशीका अध्यक्ष देवेन्द्र गुप्ताले विभिन्न धार्मिक कार्यक्रम अघि बढाउन र हिन्दू धर्मको रक्षाका लागि महायज्ञ लगाएको बताए । शिक्षा, संस्कृति, साहित्व र समाजलाई जोगाउनका लागि सबै नागरिक एक ठाउँमा उभिनुपर्ने उल्लेख गर्दै मुलुकको रक्षा हिन्दू धर्म र संस्कृतिले मात्र जोगाउन सक्ने उनले बताए ।
हिन्दु स्वयंसेवक संघ नेपालका सहसचिव महेन्द्र साहले सनातन धर्मको संरक्षण र रक्षाको लागि एक जुट भएर अगाडि बढेको सन्देश दिन गाउँ–गाउँमा महायज्ञ लगाएर अगाडि बढ्ने बताए । देवागञ्चमा भएको जस्तै महाज्ञ अन्य ठाउँहरूमा पनि हुने उनले बताए । पछिल्लो समय नेपालमा संस्कृत विषयको अध्ययन र गुरुकुल पद्धतिको पढाइमा वृद्धि भएकोप्रति खुसी समेत व्यक्त गरेका छन् ।
विश्व हिन्दू परिषद् नेपाल, देवानगञ्जका अध्यक्ष समर किशोर मेहताको सभाध्यक्षमा भएको कार्यक्रममा कोशी प्रदेश सभा सदस्य रामप्रसाद मेहता, देवानगञ्ज गाउँपालिका अध्यक्ष बेचनप्रसाद मेहता, विश्व हिन्दू परिषद्का राष्ट्रिय संगठन मन्त्री प्रल्लादकुमार रेग्मी, हिन्दुवादी अभियन्ता तथा पत्रकार कौशल निरौला, अरविन्द मेहता र ब्रह्मदेव मेहता लगायतको सहभागिता रहेको थियो ।
